Ah remember years ago in de oval carnival sunday night fete ah see ah half white young ting putting down ah serious wine an say tuh mihself time tuh move bro.
So ah kinda edge up edge up tuh de ting (yuh know how decent man does do it)
until ah get with in touching distance, well de gyul like she have eyes in de back ah she head, nex tung ah know she fire ah back kick kung fu style, well in dem days ah real fit (playing national hockey an ting) so ah jump back an hold on tuh she leg , so dis is de scenario I holding on tuh she leg , she watching mih vex vex music blasting loud loud an people jamming.
She say " Can I have my leg back please? "
I say " If ah give yuh it back yuh eh go raise de nex one at mih ?"
She say " Nah ah jus eh want no man wine on mih ?
I say " Fair enough I doh want no man wine on mih either"
She laff an ask mih mih name , talk start an we wine on each other fuh de rest of de night an fuh about de nex two years.
Unfortunately for me she went away tuh study an ah eventually lose contact .
But dat white wine coulda be mih permanent flavour , ah coulda open ah winery with dat ting an make many small bottles ah wine
![Drool :drool:](https://www.socawarriors.net/forum/Smileys/socawarriors/drool.gif)